Biografie

Yvonne wördde in 1966 in Hollandscheveld geboren. Zij was het veirde kiend van de in verre umtrek bekend staonde madenboer Harm en Zwaantje Hooijer. Femilie Hooijer was niet allent bekend vanwege het feit dat de deurdringende madengeur in de verre umtrek te roeken was, mar ok umdat zij de ienige madenkweker waren in hiel Europa. As jong maagie was Yvonne dan ok geregeld te vienden in de schuren, veur de lösse verkoop van maden veur de vissers in de buurte. Heur jeugd an de wieke was niet deursnee te neumen. Want naost de maden was der ok nog een garage op ’t arf. Daor repareerde heur breur schade-auto’s, die later weer verkocht wördden. En dat was nog niet alles. Der was ok nog een old papier schure, waor karton en papier recycled wördden.

Yvonne maakte veule mit, daor achter op de wieke. Zoveule, dat zij al heur belevenissen opschreef in dagboekies. Die bint in de loop der jaoren al regelmaotig gebruukt as naoslagwark, umdat de herinnerings van sommige gezinsleden niet altied even helder bleken.

Nao de legere schoele gung zij naor de MAVO en later naor de HAVO an ’t Ogeveine. In die periode leerde zij Johan kennen, mit wie zij in 1988 trouwde en waornao zij de name Biel (Bijl) veur heur maagiesname kreeg. Samen hebt zij drei kiender ekregen: Rowdy, Robbin & Rémon. In de tussentied gung zij an ’t wark op een accountantskantoor as receptioniste/telefoniste, waor zij bijna 25 jaor ewarkt hef. Nao een opleiding medisch secretaresse is zij in 2008 in het Bethesda Ziekenhuus gaon warken op de afdeling radiologie.

Schrieven döt zij al heur hiele leven. Heur geheime geveulens schreef zij op in heur dagboeken, later kwamen daor gedichties en korte verhaalties bij. As bestuurslid binnen verschillende verenigingen kwam heur schrieftalent goed van pas. Zij wördde altied veuredragen as secretaresse.

Een paar jaor eleden hef zij de ‘Drenthecursus’ van ’t Huus van de Taol evolgd. Naor anleiding daorvan wördde de liefde veur de Drentse Taal nog meer anewakkerd. Heur grote hobby wördde heur grote passie: het schrieven in ’t Drèents van Zuud-West-Drenthe. Dizze cursus was een prachtig opstappie naor de ‘Schriefwarkgroep’ in Beilen.

Dan blek mar weer dat van ‘t iene ’t aandere komp. Zo hef zij gedichten veurelezen bij Taal an Taofel in Noord-Sleen en Dwingeloo, hef zij op ’t Brummelfestival estaone in Pesse en mit deel eneumen an Loketpoëzie in Beilen. Mit as klap op de vuurpijle het lanceren van heur eerste gedichtenbundel Zwanekiend in september 2018.

Ok is zij vanof november 2018 vaste columniste veur de internetsite Regionieuws Hoogeveen.nl. Um d’aandere weke kuj daor een verhaol vienden aover ‘De Baos en ikke.’ Dizze verhalen bint inmiddels ebundeld tot een boek van 231 bladzijden. Te koop via dizze site, bij de Bruine Beer en Gerans an ‘t Ogeveine en bij Monre Woondecoratie in Hollandscheveld.

Sinds april 2019 is ter een neie uutdaging bijekomen mit het annemen van de functie van streektaolambassadeur van ‘t Ogeveine. Ien van de belangriekste taken daorbij is het uutdragen van de Drentse Taol in positieve zin.

Vanof september 2020 drag Yvonne wekelijks een gedicht of kort verhaal veur bij ‘Met Koopman op Pad’, via heur eigen Youtube kanaal.

Yvonne is ok uut te neudigen bij biezundere gelegenheden. Bijveurbeeld:

  • Dichter in Huus – ik make een passend gedicht of verhaal veur een speciale gebeurtenis in de privé sfeer. Ie kunt dèenken aan een verjaordag, borrel, huusfeest of jubileum;
  • Veurlezen van gedichten en/of korte verhaalties bij verenigings of dergelijke;
  • Persoonlijke tekst of gedicht veurdragen op begrafenis of crematie.

Stuur mar een mail naor moi@yvonnebijl.nl.

Op dizze website bint regelmaotig neie gedichten en verhaalties te vienden! Kiek ok ies bij het leste NEIS.