Biografie

Moi,

Barre mooi daj op mien site bint belaand. Graag wil ik mij an oe veurstellen:

Ik bin Yvonne Bijl-Hooijer en bin in 1966 in Hollandscheveld geboren, as veirde kiend van de madenboeren Harm en Zwaantje Hooijer. Wij waren  niet allent bekend en berucht vanwege de deurdringende staank van de maden, mar ok umdat mien va en moe de ienige madenkwekers waren in hiel Europa. As jong maagie was ik dan ok geregeld te vienden in de schuren, veur de lösse verkoop van maden veur de vissers in de buurte. Mien jeugd an de wieke was niet deursnee te neumen. Want naost de maden was der ok nog een garage op ’t arf. Daor repareerde mien breur Jan schade-auto’s, die later weer verkocht wördden. En dat was nog niet alles. Der was ok nog een old papier schure, waor karton en papier recycled wördden. Daor zweidde breur Bert de scepter aover.

Ik maakte veule mit, daor achter op de wieke. Zoveule, da”k al mien belevenissen opschreef in dagboekies. Die bint in de loop der jaoren al regelmaotig gebruukt as naoslagwark, umdat de herinnerings van sommige gezinsleden (veural die van zus Ina) niet altied even helder bleken.

Nao de legere schoele gung ik naor de MAVO en later naor de HAVO an ’t Ogeveine. In die periode leerde ik Johan kennen, mit wie ik in 1988 trouwde en waornao de name Biel (Bijl) veur mien maagiesname kwaamp te staon. Samen hebbe wij drei kiender ekregen: Rowdy, Robbin & Rémon. In de tussentied gung ik an ’t wark op een accountantskantoor as receptioniste/telefoniste, waor a’k zowat 25 jaor ewarkt hebbe. Nao een opleiding medisch secretaresse bin’k in 2008 in het Bethesda Ziekenhuus gaon warken op de afdeling radiologie.

Schrieven doe’k eigenlijk al mien hiele leven. Mien geheime geveulens schreef ik, zoa’k al zee op in dagboeken, later kwamen daor gedichies en korte verhalen bij. As bestuurslid binnen verschillende verenigingen kwam mien schrieftalent goed van pas, want ik bin meerdere keren secretaresse ewest.

Helderop een paar jaor eleden heb ik de ‘Drenthecursus’ van ’t Huus van de Taol evolgd. Naor anleiding daorvan wördde de liefde veur de Drentse Taal nog meer anewakkerd. Mien grote hobby wördde mien allergrootste passie: het schrieven in ’t Drèents van Zuud-West-Drenthe. Dizze cursus was een prachtig opstappie naor de ‘Schriefwarkgroep’ in Beilen, waor a’k sinds 2016 les kreeg van Baukje Bloemert. Tussendeur schrief ik ok graag gedichies in ’t Nederlands. Mien mooisten he’k inmiddels op wenskaorten laoten drukken.

Der is een bulte gebeurd in een paar jaor tied. Zo he’k gedichten veurelezen bij Taal an Taofel in Noord-Sleen en Dwingeloo, he’k twei keer op ’t Brummelfestival estaone in Pesse en veur edragen tiedens gezellige aovends. In september 2018 he’k mien eerste gedichtenbundel Zwanekiend uutebracht. Ter herinnering an mien moe Zwaantje.

Vanof november 2018 bin’k vaste columniste veur de internetsite Regionieuws Hoogeveen.nl. Um d’aandere weke op donderdag kuj daor een verhaol vienden aover De Baos & Ikke. Dizze verhalen bint inmiddels ebundeld tot een boek van 231 bladzijden. Hij is te koop via dizze site, bij de Bruine Beer en Gerans an ’t Ogeveine en bij Monre Woondecoratie in Hollandscheveld.

Sinds april 2019 is ter een neie uutdaging bijekomen mit het annemen van de functie van streektaolambassadeur van ’t Ogeveine. Ien van de belangriekste taken daorbij is het uutdragen van de Drentse Taol in positieve zin.

Vanof september 2020 draag ik bijna wekelijks een gedicht of kort verhaal veur bij ‘Met Koopman op Pad’, via mien eigen Youtube kanaal.

Tot slot: Ik bin ok uut te neudigen bij biezundere gelegenheden. Bijveurbeeld:

  • Dichter in Huus – ik make een passend gedicht of verhaal veur een speciale gebeurtenis in de privé sfeer. Ie kunt dèenken aan een verjaordag, borrel, huusfeest of jubileum;
  • Veurlezen van gedichten en/of korte verhaalties bij verenigings of dergelijke;
  • Levensverhaal veurdragen (al dan niet mit een gedicht) bij een begrafenis of crematie.

Stuur mar een mail naor moi@yvonnebijl.nl.

Op dizze website bint regelmaotig neie gedichten en verhaalties te vienden! Kiek ok ies bij het leste NEIS.

Nou, moi hè!