Hemmeltied

Der bint van die dagen dan vuul ik ’t knagen

’t kriebelt en jokt mij in d’hoed

’t Veurjaor hangt zwaor, mien huusie mut klaor

hemmeltied raost deur mien bloed

 

Oh herig, oh herig, wat is alles smerig

mien roeten, ik magge mij schamen

de zunne schient fel, ’t is kommer en kwel

ik stortte mij eerst op mien ramen

 

Mit sponse en wisser wordt alles weer frisser

temiensten: ‘t is een begun

zit mien klussie der op, he’k wat aans in mien kop

al wo’k liever stoppen a’k kun

 

Ik vuule mien haanden ontiegelijk braanden

de spinnenrag vlög mij um d’oren

waor is nou mien ragger, ik vuule mij bagger

lao’k eerst ies die biesten vermoorden

 

Koom’k in de keuken, word mien plan weer ebreuken

die kassies die liekt ja wel broen

de gevarfde kleuren op mien roomwitte deuren

zij liekt in ’t niks meer op toen

 

Ik griepe wat water en een klein beetie later

is de vriezer inienen de pineut

’t Ies dat der zit mak de inhold te wit

nou bin’k ok nog diepvriestechneut

 

Ik poetse en knalle, constant as een malle

’t kriebelt en jokt mij in d’hoed

de klussen waren zwaor, mar mien huus is weer klaor

en hemmelen veur een jaor uut mien bloed